ഒരു പൊട്ടിത്തെറിയിലൂടെ താനേ ജീവൻ ഉണ്ടായിവരുമോ?
നഗരത്തിലുടനീളം ഇത്തരത്തിലുള്ള ഒരു പോസ്റ്റർ കണ്ടപ്പോഴാണ്‌ ഇതെന്താ പരിപാടി എന്നൊരു ആകാംക്ഷ തോന്നിയത്‌. മാതൃഭൂമിയിൽ ഒരു ന്യൂസ്‌ കഷ്ണം കണ്ടപ്പോൾ പോയി നോക്കാൻ തീരുമാനിച്ചു. ഒന്നുമില്ലെങ്കിലും മന്ത്രിയൊക്കെ ഉൽഘടിച്ച പരിപാടിയല്ലേ.
ദിശ-2010 മൾട്ടിമീഡിയ ഷോ തുടങ്ങി
തിരുവനന്തപുരം: ശാസ്ത്രം, യുക്തി, വിശ്വാസം എന്നീ വിഷയങ്ങൾ ആസ്പദമാക്കിയുള്ള മൾട്ടിമീഡിയ പ്രദർശനമായ 'ദിശ 2010' പുത്തരിക്കണ്ടം മൈതാനത്ത്‌ മന്ത്രി വി.സുന്ദ്രേൻപിള്ള ഉദ്ഘാടനം ചെയ്തു. കെ.വി.എബ്രഹാം അധ്യക്ഷതവഹിച്ചു. മലങ്കര ഓർത്തഡോക്‌സ്‌ സിറിയൻ ചർച്ച്‌ ഭദ്രാസനാധിപൻ ഡോ.ഗബ്രിയേൽ മാർ ഗ്രിഗോറിയോസ്‌ മുഖ്യസന്ദേശം നൽകി.
തിരുവട്ടാർ കൃഷ്ണൻകുട്ടി, പൊതുവിദ്യാഭ്യാസ പ്രിൻസിപ്പൽ സെക്രട്ടറി ജെയിംസ്‌ വർഗീസ്‌ എന്നിവർ പ്രസംഗിച്ചു. 11 മുതൽ വൈകീട്ട്‌ 7 വരെ പൊതുജനങ്ങൾക്ക്‌ പ്രവേശനം ഉണ്ടായിരിക്കും.
17, 18, 19, 20 തീയതികളിൽ കരിയർ സെലക്ഷൻ, കുടുംബജീവിതം, കുട്ടികളെ എങ്ങനെ വളർത്താം, സ്‌ട്രെസ്‌ മാനേജ്‌മെന്റ്‌ എന്നീ വിഷയങ്ങളെ ആസ്പദമാക്കി രാവിലെ 11 മുതൽ ഒരുമണിവരെ സെമിനാറുകളും ഉണ്ടായിരിക്കും. പ്രദർശനം 21ന്‌ അവസാനിക്കും.
പുത്തരിക്കണ്ടം മൈതാനിയിൽ വലിയൊരു സ്റ്റാൾസമുച്ചയം കെട്ടിയിട്ടാണ്‌ പരിപാടി, കണ്ടാലറിയാം പണം ചെലവഴിക്കാൻ കപ്പാസിറ്റിയുള്ള സംഘടനകളാണ്‌ പിന്നിലെന്ന്. ഏതാണ്‌ ദിശ എന്നേ അറിയേണ്ടതുള്ളു.
പേരും നാളുമൊക്കെ എഴുതിക്കൊടുത്ത്‌ അകത്തുകടന്നപ്പോൾ ഒരു കുട്ടിസെറ്റ്‌ ആകാംക്ഷയോടെ പോസ്റ്ററുകളിൽ നോക്കി അന്തംവിട്ട്‌ നിൽക്കുന്നതുകണ്ടു. ഞാനും അവരുടെ കൂടെ കൂടി.
കൃത്യമായ വഴികൾ, എല്ലായിടത്തും പോസ്റ്ററുകൾ, അവയിലെഴുതിയവ 'വിശദീകരിക്കാൻ' ഒരു കമന്റേറ്ററും, ഇടയ്ക്കിടെ ഇക്കാര്യങ്ങൾക്കെല്ലാം കൂടുതൽ ദൃശ്യാനുഭവം നൽകാൻ മൾടിമീഡിയ പ്രെസന്റേഷൻ, അതാണ്‌ പ്രദർശനത്തിന്റെ ഘടന.
ആദ്യസെക്ഷൻ നമ്മുടെ പ്രപഞ്ചത്തെക്കുറിച്ചാണ്‌.
നമ്മുടെ പ്രപഞ്ചം എന്നാൽ "ഇത്ര" വലുതാണെന്നും നമ്മുടെ പ്രപഞ്ചത്തിൽ കോടിക്കണക്കിന്‌ ഗ്രഹങ്ങളുണ്ടെന്നും പ്രകാശവേഗത്തിൽ സഞ്ചരിച്ചാൽപ്പോലും അടുത്ത നക്ഷത്രത്തിലെത്താൻ മനുഷ്യായസ്സ്‌ മതിയാവില്ലെന്നും പറഞ്ഞപ്പോൾ കുട്ടികൾ അദ്ഭുതത്തോടെ നോക്കിനിന്നു. പിന്നെ ഗ്യാലക്സികളുടെ വിവരണമായിരുന്നു. വിവിധതരം ഗ്യാലക്സികൾ, പടങ്ങൾ ഒക്കെയായി ഒരു പോസ്റ്റർ. അതുകഴിഞ്ഞ്‌ സൂര്യൻ, ഭൂമി എന്നിവയുടെ പ്രത്യേകതകൾ.
അടുത്ത ഊഴം ബിഗ്‌ബാംഗിന്റേതായിരുന്നു. കാര്യങ്ങൾ വിഷയത്തോട്‌ അടുക്കുന്നത്‌ ഇവിടെയാണ്‌
ബിഗ്‌ബാംഗ്‌ എന്ന പൊട്ടിത്തെറിയോടെയാണ്‌ പ്രപഞ്ചത്തിന്റെ ആരംഭം എന്ന് ശാസ്ത്രം പറയുന്നു എന്ന ആമുഖമാണ്‌ ആദ്യം കേട്ടത്‌.
ബിഗ്‌ബാംഗിന്റെ ടൈംലൈൻ വിശദമാക്കുന്ന പോസ്റ്റർ. ഇന്ന സമയത്ത്‌ താപനില ഇത്രയായിരുന്നു, പിന്നീട്‌ ഇത്രയായി, പ്രോട്ടോൺ ന്യൂട്രോൺ ഇലക്ട്രോൺ ഒക്കെ ഉണ്ടായി ഗ്രഹങ്ങൾ ഉണ്ടായി....... വിശദീകരണം ഇത്രമാത്രം.
അവസാനം ഒരു ചോദ്യവും. നേരത്തെ പ്രപഞ്ചത്തിന്റെ വലിപ്പവും മറ്റും നിങ്ങൾ കണ്ടതല്ലെ, ഇങ്ങിനെ ഒരു പൊട്ടിത്തെറിയിലൂടെയാണ്‌ ഇതൊക്കെ ഉണ്ടായതെന്ന്‌ നിങ്ങൾ കരുതുന്നുണ്ടോ? ഉത്തരവും കമന്റേറ്ററുടേത്‌ തന്നെ ഇല്ല.
കമന്റേറ്റർ തുടർന്നു. നമുക്കറിയാം, ഒരു പൊട്ടിത്തെറിയിൽ സംഭവിയ്ക്കുന്നത്‌ സാധനങ്ങൾ ചിതറിത്തെറിക്കുകയാണെന്ന്‌. അങ്ങിനെ ചിതറിത്തെറിച്ച്‌ ഇക്കാണുന്ന സങ്കീർണ്ണമായ പ്രപഞ്ചം ഉണ്ടാകുമോ? ചിന്തിക്കൂ.
ഞാനൊരു കുഞ്ഞുസംശയം ചോദിച്ചു. ബിഗ്‌ബാംഗ്‌ എന്നാൽ പൊട്ടിത്തെറിയാണെന്ന്‌ നിങ്ങളോടാരാണ്‌ പറഞ്ഞത്‌?
ഉത്തരം സഹായിയായി നിന്ന ഒരാളുടേതായിരുന്നു.
നമുക്കറിയാം ഇവിടെ എന്തുമാത്രം എനർജി ഉണ്ടെന്ന്‌. സൂര്യനിൽ നിന്നുതന്നെ എത്രയോ ഊർജം നമുക്ക് ലഭിയ്ക്കുന്നുണ്ട്‌. ഇക്കാണുന്ന വലിയ ഗ്രഹങ്ങളും പദാർത്ഥങ്ങളും ഊർജവുമൊക്കെ എങ്ങിനെയാണ്‌ ഒരു മൈന്യൂട്ട്‌ പോയിന്റിൽ എത്തിയത്‌? ഇതൊന്നും ശാസ്ത്രം പറയുന്നേയില്ല.
ചോദ്യവും ഉത്തരവും തമ്മിൽ ബന്ധമൊന്നും കണ്ടില്ല. ബിഗ്‌ബാംഗിനെക്കുറിച്ച്‌ അൽപമെങ്കിലും വായിച്ചുനോക്കൂ എന്നൊരു വാചകത്തോടെ ഞാൻ ചർച്ച നിർത്തി നടന്നുനീങ്ങി.
Meanwhile, കമന്റേറ്റർ അടുത്ത ബാച്ചിനുള്ള പ്രസംഗത്തിലാണ്‌. ഈ പൊട്ടിത്തെറിയിൽ നിന്നും ഉണ്ടായ ഒരു ചെറിയ കഷ്ണമാണ്‌ ഭൂമി എന്ന് നിങ്ങൾക്ക്‌ കരുതാനാവുമോ എന്നൊരു ചോദ്യം കൂടി കേട്ടു.
ഓഹോ, അപ്പോൾ കാര്യം ഇതാണ്. ഇക്കണ്ട പദാർത്ഥങ്ങളെല്ലാം കൂടി ഞെക്കിപ്പിഴിഞ്ഞ്‌ സത്ത മാത്രമാക്കി ഒരു ആറ്റത്തിന്റെ വലിപ്പത്തിലേയ്ക്കെത്തിച്ച്‌ പൊട്ടിച്ചതാണ്‌ ബിഗ്‌ബാംഗ്‌. ഹാവൂ, സമാധാനമായി.
പിന്നീട്‌ കണ്ട പോസ്റ്റർ പ്രപഞ്ചത്തിന്റെ സന്തുലിതാവസ്ഥയെക്കുറിച്ചായിരുന്നു. ആന്ത്രോപ്പിക്‌ കോൺസ്റ്റന്റുകൾ വെച്ചൊരു കളി.
ഭൂമിയുടെ അന്തരീക്ഷത്തിൽ 21% ഓക്സിജൻ ആണ്. അതെങ്ങാൻ 15% ആയാൽ നമ്മളൊക്കെ ശ്വാസം കിട്ടാതെ മരിക്കും. 25% ആയാലോ, ഒരു സ്പാർക്ക്‌ മതി, ഭൂമി മുഴുവൻ കത്തിച്ചാമ്പലാകും.അയ്യൊ, അതൊരു സംഭവം തന്നെ. അപ്പോൾ ഓക്സിജൻ ഇങ്ങിനെ നിലനിൽക്കുന്നതിനാലാണ്‌ ഭൂമി തന്നെ നിലനിൽക്കുന്നത്‌. മനുഷ്യനുവേണ്ടിയാണ്‌ ഭൂമിയിൽ ഓക്സിജൻ എന്നതും പുതിയ അറിവാണ്‌.ഗുരുത്വാകർഷണം ഇന്ന ശതമാനം (Decimal point കഴിഞ്ഞുള്ള പൂജ്യങ്ങൾ എണ്ണാൻ സമയം കിട്ടിയില്ല) കൂടുകയോ കുറയുകയോ ചെയ്താൽ സൂര്യൻ നിലനിൽക്കില്ല.ഓഹോ, അങ്ങിനെയാണോ കാര്യം. ഈ ഗുരുത്വാകർഷണം എന്ന് പറയുന്നത് വസ്തുവിന്റെ mass അനുസരിച്ചാണെന്നാണ്‌ ഞാൻ പഠിച്ചിട്ടുള്ളത്‌. ഇതിലിപ്പൊ ഏത്‌ ഗുരുത്വാകർഷണശക്തിയെക്കുറിച്ചാണ്‌ പറയുന്നത്? സൂര്യന്റെയോ ഭൂമിയുടേയോ മറ്റുവല്ലതിന്റേതുമോ?
വീണ്ടും കമന്റേറ്റർ വക ചോദ്യം
ഇതെല്ലാം ഇങ്ങിനെ സന്തുലിതമായി ഇരിയ്ക്കുന്നത്‌ വെറുതെയങ്ങ്‌ ഉണ്ടായിവന്നതാണോ? അതോ ഒരു ബുദ്ധിമാനായ സ്രഷ്ടാവിന്റെ രൂപകൽപനയാണോ?
സംശയമെന്ത്‌ (വീണ്ടും ഉത്തരം പറയുന്നത് ചോദ്യകർത്താവ്‌ തന്നെ), ഇതെല്ലാം ഒരു സ്രഷ്ടാവിന്റെ രൂപകൽപനയാണ്‌. ഇതെല്ലാം മനുഷ്യനുവേണ്ടി ഡിസൈൻ ചെയ്തിരിക്കുന്നതാണ്‌.
മനുഷ്യാ, നീ മണ്ണല്ല, പാപിയല്ല. ഈ ലോകം മുഴുവൻ നിനക്ക്‌, നിനക്കുവേണ്ടി മാത്രം, ഉള്ളതാകുന്നു.
ഞാനധികം നിന്നില്ല, ഒരു മൾടിമീഡിയ ഷോ കാത്തിരിക്കുന്നു.
ഞാൻ അകത്ത്‌ കയറി. ആദ്യഷോ പ്രപഞ്ചത്തിന്റെ സങ്കീർണ്ണതയെക്കുറിച്ച്‌. കുറേ ആനിമേഷൻ സംഭവങ്ങളും ചിത്രങ്ങളുമൊക്കെയായി ഒരു ജഗപൊക.
ഷോ കഴിഞ്ഞ്‌ പുറത്തെത്തിയപ്പോൾ പിന്നെ കാണാവുന്നത്‌ ഭൂമിയിലെ ജീവനെക്കുറിച്ചാണ്‌. ഭൂമിയിൽ എന്തല്ലാം ഉണ്ടെന്നും ജീവിവർഗ്ഗത്തിന്റെ വൈവിധ്യവും ഒക്കെയായി ചില പോസ്റ്ററുകൾ.
അതിനുശേഷം അടുത്ത മൾടിമീഡിയ ഷോ. കുറേ വീഡിയോ ദൃശ്യങ്ങൾ, (നാഷണൽ ജ്യോഗ്രാഫിക്കും അനിമൽ പ്ലാനറ്റുമൊക്കെ ഉള്ളപ്പോൾ വീഡിയോ ദൃശ്യങ്ങൾക്കാണോ പഞ്ഞം) ഡിഎൻഏ ഘടന, അതിന്റെ സങ്കീർണ്ണത....
കണ്ണ്‌ ബൾബാക്കി ഇരുന്നുകണ്ടു. ശ്ശെടാ, ഇവന്മാർക്ക്‌ പരിണാമം എന്നത്‌ ഒരു കഥയല്ലായിരിക്കുമോ? അതേക്കുറിച്ചൊന്നും കണ്ടില്ല?
ഏറെ വിഷമിക്കേണ്ടിവന്നില്ല.
അടുത്ത സെക്ഷൻ പരിണാമത്തിനുള്ളതാണ്‌. പരിണാമം എന്നാൽ ചുമ്മാ അങ്ങ്‌ ഉണ്ടായി വരുന്നതാണ്‌. ഡിഎൻഎ പോലൊരു സാധനം ചുമ്മാ ഉണ്ടായി വരുമോ?
ചില ഇക്വേഷനുകളും കണ്ടു.
പദാർത്ഥം+സമയം+പ്രപഞ്ചനിയമങ്ങൾ+പ്രകൃതിശക്തികൾ+യാദൃശ്ചികസംഭവങ്ങൾ=ജീവൻ എന്നതാണോ ശരി പദാർത്ഥം+ബുദ്ധിമാനായ ഡിസൈനർ+സമയം=ജീവൻ ഇതാണൊ ശരി.
കോളേജിൽ പഠിക്കുന്ന പ്രായം തോന്നിയ്ക്കുന്ന ഒരു കുട്ടിയാണ്‌ എക്സ്പർട്ട്‌.
ഇവിടെയും എന്റെ ക്ഷമ ചെറുതായൊന്ന്‌ വഴിവിട്ടു. ഞാൻ ചോദിച്ചു.
ഈ ബുദ്ധിമാനായ ഡിസൈനർ ഉണ്ടെങ്കിൽ സമയം എന്തിനാണ്‌? ചുമ്മാ അങ്ങ്‌ ഉണ്ടാക്കിയാൽ പോരേ?
പാവം കൊച്ച്‌, ഒന്ന്‌ വിരണ്ടോ എന്നൊരു സംശയം. അവർ പറഞ്ഞു അതുതന്നെയാണ്‌ കാര്യം. ഇതിൽ സമയം ഒരു ഫാക്റ്റർ അല്ല
അതെനിക്കത്ര സുഖകരമായി തോന്നിയില്ല. ഞാൻ വീണ്ടും ചോദിച്ചു. "ഭൂമിയിൽ ജീവൻ ഉണ്ടായിട്ട്‌ മൂന്നര ബില്യൺ വർഷങ്ങളിലധികമായെന്നാണല്ലൊ ശാസ്ത്രം പറയുന്നത്"
കൊച്ച്‌ വീണ്ടും പറഞ്ഞു. "അതത്ര വിശ്വസിക്കാമോ, കാർബൺ ഡേറ്റിങ്ങ് ഒക്കെ വിശ്വസനീയമാണോ"
ഹൗ, ഇതൊരു വഴിക്ക്‌ പോകില്ല. "പഴയ ഫോസിലുകളുടെ കാലഗണന കാർബൺ ഡേറ്റിങ്ങ് ഉപയോഗിച്ചാണ്‌ നിർണ്ണയിക്കുന്നതെന്ന്‌ ആരാ പറഞ്ഞത്‌?"
ഇത്തവണ കമന്റേറ്റർ കുട്ടി ആശയക്കുഴപ്പത്തിലായി. "എനിക്ക്‌ അത് വലിയ പിടിയില്ല, സംശയങ്ങൾ അപ്പുറത്ത്‌ ചോദിച്ചോളൂ"
അൽപം കൂടി പ്രിപറേഷൻ ആവാം എന്നൊരു കമന്റോടെ എന്റെ കമന്ററി അവസാനിപ്പിച്ചു. പുറത്തേയ്ക്കിറങ്ങാനുള്ള വഴികൾ അന്വേഷിക്കലായി അടുത്ത പടി.
പിന്നീടുള്ള വഴി നിറയെ പോസ്റ്ററുകളുടെ സ്വഭാവം അൽപം വ്യത്യസ്തമാണ്‌. മനുഷ്യൻ പാപിയായാണ്‌ ജനിക്കുന്നത്‌, അരുതാത്തത്‌ ചെയ്തു, ഇപ്പോഴും ചെയ്തുകൊണ്ടിരിക്കുന്നു.....
അത്ര പെട്ടെന്ന്‌ ഇറങ്ങാൻ എനിക്ക്‌ സാധിച്ചില്ല.
ഒരു ഭാഗത്ത്‌ കുറച്ചുപേരെ ഇരുത്തി വലിയൊരു പ്രസംഗം നടത്തുന്നുണ്ട്‌. അത് കേൾക്കാതെ കടന്നുപോകാൻ അനുവാദമില്ല. മുഴുവൻ കേട്ട്‌ നിന്നു. വിഷയം അതുതന്നെ. ഏറ്റവും കഷ്ടമായി തോന്നിയത്‌ Accept that you are a sinner എന്ന ആശയമാണ്‌.
ഒരു ഫൈനൽ മൾടിമീഡിയ പ്രസന്റേഷൻ കൂടിയുണ്ടായിരുന്നു. യേശുവിന്റെ കുരിശുമരണവും മറ്റും വിശദമായി കാണിയ്ക്കുന്ന സെക്ഷൻ. അവിടെ പുറത്തേയ്ക്കുള്ള വഴിയിൽ ഒരു ബോർഡ്‌ വെച്ച്‌ അടച്ചിട്ടുണ്ട്‌, ആ സിനിമ മുഴുവൻ കാണാതെ പുറത്തേയ്ക്കിറങ്ങാൻ സാധിയ്ക്കില്ലപോലും. (മറ്റൊരിടത്തും ഇടയ്ക്ക്‌ ഇറങ്ങുന്നതിൽ കുഴപ്പമില്ല).
ഞാൻ കണ്ട രംഗം യേശുവിനെ കുരിശിൽ തറയ്ക്കുന്നതുതന്നെയായിരുന്നു. കുട്ടികൾക്ക്‌ കാണാൻ പാകത്തിൽ ശരീരം മുഴുവൻ രക്തമൊലിപ്പിച്ച രൂപത്തെ (നടനെ) കുരിശിലേറ്റുന്ന രംഗം. ഒരു വിധത്തിൽ ഞാൻ പുറത്തെത്തി, ബോർഡ്‌ ഒന്ന്‌ ചെരിച്ചുവെച്ച്‌ തന്നെ.
പുറത്തേയ്ക്കിറങ്ങാനുള്ളയിടത്ത്‌ ഒരു കടമ്പ കൂടിയുണ്ട്‌, ഫീഡ്‌ബാക്ക്‌. എനിക്ക്‌ ഒന്നേ എഴുതാനുണ്ടായിരുന്നുള്ളു.
ഇങ്ങിനെ ശാസ്ത്രം തെറ്റായി പറഞ്ഞുകൊടുത്ത്‌ കുട്ടികളെക്കൂടി വഴിതെറ്റിയ്ക്കരുതേ ദയവായി.
+++++++++++++++++++++++++++++++++++++++++
ദൈവവിശ്വാസം എന്തോ ആകട്ടെ, ശാസ്ത്രം പറയുന്ന കാര്യങ്ങൾ തെറ്റിദ്ധരിപ്പിയ്ക്കുംവിധം അവതരിപ്പിച്ച്‌ (പലപ്പോഴും തെറ്റായ വിവരം നൽകി) ഇതെല്ലാം തെറ്റാണെന്ന്‌ തെളിയിച്ച്‌ ആളെക്കൂട്ടുന്നതെന്തിന്‌?
ശാസ്ത്രം പറയുന്ന ഒരുപാട്‌ കാര്യങ്ങൾ (പ്രപഞ്ചം എത്ര വിശാലം, സൂര്യനിൽ എന്ത് സംഭവിയ്ക്കുന്നു, ആറ്റത്തിന്റെ ഘടനയെന്ത്‌, ഡിഎൻഎയുടെ ഘടനയെന്ത്‌ തുടങ്ങിയവ) അവർക്ക്‌ നൂറുശതമാനം ശരിയാണ്‌. പക്ഷെ മറ്റുപലതും, വേദപുസ്തകങ്ങളിലുള്ളവയെ അപ്രസക്തമാക്കുന്നവ, സ്വീകാര്യമല്ലതാനും. അതിനായി അവർ കണ്ടെത്തുന്ന വഴിയോ?
ഒരു ഫൈനൽ ചോദ്യം കൂടി.
ഒരു മതവിശ്വാസസംബന്ധമായ കാര്യത്തിന്‌ മന്ത്രി സംബന്ധിക്കുന്നതും ഉൽഘാടനം ചെയ്യുന്നതും മനസിലാക്കാം. പക്ഷെ ശാസ്ത്രത്തെ തെറ്റിദ്ധരിപ്പിച്ച്‌ നടത്തുന്ന ഒരു മതപ്രചരണസംരംഭത്തിന്‌ മന്ത്രി എന്തിന്‌ കൂട്ടുനിൽക്കണം?
എന്റെ ചിന്തകൾ
Subscribe to:
Post Comments (Atom)
25 comments:
:)
ഇതിന്റെ ലേബൽ നർമ്മം എന്നുവേണോ അതോ പ്രതികരണം എന്ന് വേണോ?
കേരള ഇസ്ലാമിക് മിഷന്റെ ഒരു ലീഫ്ലെറ്റ് കിട്ടിയിരുന്നു. കുറച്ച് വര്‍ഷങ്ങള്‍ക്ക് മുമ്പ്. അതില്‍ പറയുന്നതും അപ്പൂട്ടന്‍ അവിടെ കണ്ടകാര്യം തന്നെ:- "നമ്മുടെ പ്രപഞ്ചം എന്നാൽ "ഇത്ര" വലുതാണെന്നും നമ്മുടെ പ്രപഞ്ചത്തിൽ കോടിക്കണക്കിന്‌ ഗ്രഹങ്ങളുണ്ടെന്നും പ്രകാശവേഗത്തിൽ സഞ്ചരിച്ചാൽപ്പോലും അടുത്ത നക്ഷത്രത്തിലെത്താൻ മനുഷ്യായസ്സ്‌ മതിയാവില്ലെന്നും പറഞ്ഞപ്പോൾ കുട്ടികൾ അദ്ഭുതത്തോടെ നോക്കിനിന്നു. പിന്നെ ഗ്യാലക്സികളുടെ വിവരണമായിരുന്നു. വിവിധതരം ഗ്യാലക്സികൾ, പടങ്ങൾ ഒക്കെയായി ഒരു പോസ്റ്റർ. അതുകഴിഞ്ഞ്‌ സൂര്യൻ, ഭൂമി എന്നിവയുടെ പ്രത്യേകതകൾ"
പക്ഷേ, ഒടുവില്‍ കണ്ട കാര്യത്തില്‍ കാര്യമായ വ്യത്യാസമുണ്ടായിരുന്നു. ഇതെല്ലാം സൃഷ്ടിച്ച പരിപാലിക്കുന്നത് ആരാണ്‍? ഇവിടെ 'അല്ലാഹു'വാണെന്ന് മാത്രം. ചോരയൊലിപ്പിക്കുന്ന യ്യേശുവുമില്ല. പകരം 'സ്നേഹദൂതനായ' പ്രവചകന്‍.
ശാസ്ത്രത്തെ ഇങ്ങനെ വ്യഭിചരിക്കല്ലേ എന്ന് ആരോടാണ്‍ പറയുക? കുട്ടികളില്‍ ഇതെല്ലാം ചെറുപ്പത്തിലേ കേറ്റണമല്ലോ? എന്നാലല്ലേ 'ഇന്റലിജന്റ് ഡിസനര്'ക്കൊരു ബലം വരൂ...
ഇതിനെതിരെ കേസെടുക്കാൻ വകുപ്പൊന്നുമില്ലെ.
വിദ്യഭ്യാസം ചില മതത്തിന്റെ സപ്പോർട്ടുള്ള മന്ത്രിമാരുടെ കയ്യിലാണ് പലപ്പോഴും ചെന്നെത്തുന്നത്.
ആദ്യം നിർത്തലാക്കേണ്ടത് സ്കൂളിൽ കുട്ടികളെ പഠിപ്പിക്കുന്ന ‘സന്മാർഗ്ഗം’(മോറൽ സയൻസ്) എന്ന ദൈവാസ്ഥിത്ത്വപ്രചരണമാണ്.
ആളുകൾ പുരോഗമിക്കുന്നുണ്ട്.
നാഷണൽ ജിയോഗ്രാഫിക്, എൽ.സി.ഡി, കമ്പ്യൂട്ടർ പ്രസന്റേഷൻ....
നല്ലതു തന്നെ.
ഇനിയിപ്പോ, ലോകം സൃഷ്ടിച്ചയാളെക്കൂടെ സ്ക്രീനില്ല് കാണിക്കും!
അപ്പൊ അപ്പൂട്ടന്റെ സംശയങ്ങളൊക്കെ തീരും!
""ഒരു മതപ്രചരണസംരംഭത്തിന്‌ മന്ത്രി എന്തിന്‌ കൂട്ടുനിൽക്കണം?"""
അപ്പൂട്ടന്‍ ചോദിച്ച ചോദ്യം തന്നെയാണ് എനിക്കും ചോദിക്കാനുള്ളത്, അതും ഇടതുപക്ഷത്തിന്റെ മന്ത്രി.വല്ല ബിഷപ്പോ മെത്രാനോ ചെയ്യേണ്ടത് മന്ത്രിയെ കൊണ്ട് ചെയ്യിച്ചു ആളെ കൂട്ടുക എന്ന തന്ത്രം.
ഗതികേടുകൊണ്ടാ ഷാജീ, രാഷ്ട്രീയക്കാരനായിപ്പോയില്ലെ വയറ്റുപ്പെഴപ്പല്ലേ വിട്ടുകള.ഒന്നാമത് ന്യൂനന്മാര് മറ്റവന്മാര്‍ എടയലേഖനം വായിച്ചപോലെ നാളെയിനി ഇവന്മാരെങ്ങാനും ഒരു മഠയ ലേഖനം കൂടിവായിച്ചാലോ തീര്‍ന്നില്ലേ കഥ?
Appoottan,
Posted the link to this article here.
http://jagrathablog.blogspot.com/2010/11/blog-post_2422.html
track...
കൊള്ളാം അപ്പൂട്ടാ, നന്നായി ഈ ശ്രമം.
മുമ്പൊരു പ്രസംഗത്തില്‍ നമ്മൂടെ വ്യവസായ മന്ത്രി ഒരു പരാമര്‍ശം നടത്തിയിരുന്നു. "മാരീച വേഷം " ആയിരുന്നു പരാമര്‍ശ വിഷയം . ഒരാളെ കണ്‍ഫ്യൂഷനിലാക്കാന്‍ നല്ലത് അയാളുടെ പക്ഷത്തു നിന്ന് സംസാരിക്കുക എന്നതാണത്. താന്‍ വലിയ ശാസ്ത്രജ്ഞനാണെന്ന് വരുത്തിത്തീര്‍ത്തിട്ട് ഇമ്മാതിരി ഉല്‍പ്പത്തി പുസ്തകം വിശദീകരിക്കുന്നതൊക്കെ അത്തരം തന്ത്രമാണണ്. കേട്ടുകൊണ്ടോ കണ്ടുകൊണ്ടോ ഇരിക്കുന്നവരില്‍ കണ്‍ഫ്യൂഷന്‍ സൃഷ്ടിക്കാനായാല്‍ അവരുടെ വിജയത്തിന്റെ ഒന്നാം ഘട്ടം ആരംഭിച്ചു എന്ന് പറയാം.
ഏതായാലും പാപിയും പാപവും ഒക്കെ കേട്ടപ്പോള്‍ വകുപ്പ് ഏതെന്ന് പിടികിട്ടി.
:)
മൈ ഡിയര്‍ അപ്പൂട്ടന്‍
ഇവിടെ യാതൊരു നര്‍മവും അവശേഷിക്കുന്നില്ല
വളരെ ഹീനമായ ഒരു കൊലപാതകശ്രമത്തിന്റെ മുന്നിലാണ് നാം നില്‍ക്കുന്നത്
:-)
"ഒരു ഭാഗത്ത്‌ കുറച്ചുപേരെ ഇരുത്തി വലിയൊരു പ്രസംഗം നടത്തുന്നുണ്ട്‌. അത് കേൾക്കാതെ കടന്നുപോകാൻ അനുവാദമില്ല. മുഴുവൻ കേട്ട്‌ നിന്നു.'
അപ്പോ , ഇതാണ് കാര്യം. പിന്നെ, ഈ വിദ്യഭ്യാസമന്ത്രിയുടെ നല്ലപാതി നല്ലൊരു വിശ്വാസിയാ.
ഹഹ..കാർബൺ ഡേറ്റിങ്ങ് വഴിയാണ് ജീവോൽ‌പ്പത്തിയുടെ കാലഗനന നടത്തിയത് എന്ന് പറഞ്ഞവനെ സമ്മതിക്കണം.കാർബൺ ഡേറ്റിങ്ങ് വഴി Holocene കാലയളവ് (ഏകദേശം 11000 വർഷം മുൻപ് വരെ) വരെ മാത്രമേ ക്രുത്യതയോടെ ഡേറ്റ് ചെയ്യാൻ പറ്റൂ. 50000 വർഷം വരെ ഇത് നീട്ടാം. പക്ഷെ ക്രുത്യത കുറവാണെന്ന് മാത്രം! ഇവിടെ വർഷങ്ങൾ ബില്ല്യൺ ആണ്. Rare earth isotope, Uranium isotope തുടങ്ങിയവ മാത്രമാണ് ശരണം. ക്രിസ്ത്യൻ വിശ്വാസപ്രകാരം പതിനായിരം കൊല്ലത്തിൽ താഴെയാണ് പ്രപഞ്ചായുസ്സ്! അതിനെക്കുറിച്ച് അവർ മിണ്ടിക്കാണില്ല. പിന്നെ ബിഗ് ബാങ്ങ്. അന്ധന്മാർ ആനയെ കാണും പോലെ എന്നു മാത്രമേ പറയാനുള്ളൂ. വെറുതേ വിക്കി പീഡിയയിൽ പോയാൽ എവിഡൻസ് ഓഫ് ബിഗ് ബാങ് എന്ന ആർട്ടിക്കിൾ കാണാം. ഗാലറ്റിക് എവല്ല്യൂഷന് പ്രധാന തെളിവ് ratio of elements of higher and lower atomic number ആണ്. നമുക്ക് കിട്ടുന്ന ഉൽക്കകളിൽനിന്ന് ഇത് കണക്കാക്കാവുന്നതാണ്. ആദ്യകാല ഗാലറ്റിക് ക്ലസ്റ്ററുകളിൽ കുറഞ്ഞ അറ്റോമിക നമ്പർ ഉള്ള മൂലകങ്ങൾ കൂടുതലാണ്. this is the main evidence of nucleosynthesis.
കഷ്ടം തന്നെ... മന്ത്രിയ്ക്ക് ഒരു കത്തെഴുതിയാലോ?
സത്യത്തില്‍ ചെയ്യേണ്ടത് നമ്മള്‍ ഇത് പോലെ ഒരു ഷോ സംഘടിപ്പിക്കലാണ്. ശാസ്ത്രവും മതവും പറയുന്നത് എന്തെന്ന് ആള്‍ക്കാര്‍ മനസ്സിലാക്കട്ടെ...
നന്ദി അപ്പൂട്ടന്‍..
ഈ ചെറ്റ പരിപാടി കുറച്ചു നാള്‍ മുന്‍പ്‌ ഏറണാകുളത്തും ഉണ്ടായിരുന്നു.
ഇടതു വലതു ശിഖണ്ടികളെ ഒക്കെ എന്തിനു കൊള്ളാം! ഈ നാടിന്റെ ഗതി ഇതായിപ്പോയല്ലോ!!
ശാസ്ത്രത്തെ അങ്ങനെ എല്ലാരും തള്ളിക്കളയുന്നു എന്നാണോ കരുതിയത്‌?.. അല്ല... ഇതേ വിശ്വാസികള്‍ (ക്രിസ്ത്യാനികളെ മാത്രമല്ല ഉദ്ദേശിച്ചത്) തങ്ങളുടെ വിശ്വാസങ്ങള്‍ "ശാസ്ത്രീയപരമായി" വിസ്തരിക്കാന്‍ ശാസ്ത്രത്തെ കൂട്ടുപിടിക്കുന്നു.
ഇലക്ട്രോ മാഗ്നറ്റിക് പ്രോപ്പര്‍ട്ടീസും കോസ്മിക് കിരണങ്ങളും ഭൂമിയുടെ കാന്തിക ദിശയും മറ്റും ഇല്ലെങ്ങില്‍ ഈ രുദ്രാക്ഷ കവചവും മറ്റും എങ്ങനെ ചിലവാകും??
മതമിങ്ങനെ പ്രചരി-പ്പിക്കുന്നതുതന്നെ എന്തിനാണോ!
അത് തനിയെ പ്രചരിച്ചോളില്ലേ...
ഒക്കത്തിനും ഒരു ‘ശാസ്ത്രീയ’ ലുക്കിനുവേണ്ടി കുറേ പൊടിക്കൈകളും! കഷ്ടം!
മന്ത്രി മുഴുവനായും അന്വേഷിച്ചില്ലായിരിക്കും! നിരുത്തരവാദിത്വപരമായിപ്പോയി!
അവരെയോ മന്ത്രിയേയോ കുറ്റം പറയേണ്ടതില്ല.രണ്ട് കൂട്ടരം അവരവരുടെ പണി ചെയ്യുന്നു. സംഘടനകളെയും നിലപാടുകളെയും പുച്ഛിച്ച്, ചെറുപ്പക്കാര്‍ എന്ന് അവകാശപ്പെട്ട് നടക്കുന്ന ശാസ്ത്രം പഠിച്ച് കുറേ അവന്മാര്‍ ഈ നാട്ടിലുണ്ടല്ലോ, അവര് ഇതിനൊക്കെ എതിരായി എന്ത് കോപ്പ് ചെയ്യുന്നു...? ജനത്തിനെയും സമുദായ സംഘടനകളെയും ചീത്ത വിളിക്കുന്നു. കൈ ചുരുട്ടി കാലിനിടയില്‍ വെച്ചുകൊണ്ടിരുന്ന് വിമര്‍ശനം ഉയര്‍ത്തിയിട്ട് എന്തുകാര്യം..? നിങ്ങളിലെത്ര പേര്‍ പ്രവര്‍ത്തിക്കാന്‍ തയ്യാറാണ് ഹേ..?
“ദിശ” പോലുള്ള എക്സിബിഷനുകൾ അമേരിക്കയിലെ ഇവാഞ്ജലിസ്റ്റ് പ്രാന്തന്മാരുടെ ബൈബിൾ ക്യാമ്പ് ശൈലിയിലെ ക്രിയേഷനിസം ഷോകളിൽ നിന്ന് പ്രചോദനമുൾക്കൊണ്ട് ഉണ്ടാക്കപ്പെടുന്നതാണ്. വിദേശങ്ങളിൽ ഇതിനെ കൌണ്ടർ ചെയ്യാൻ ഏയ്തീയിസ്റ്റ് സംഘടനകളുടെ നേതൃത്വത്തിൽ ശാസ്ത്ര എക്സിബിഷനുകൾ സംഘടിപ്പിക്കാറുണ്ട്. നമ്മുടെ ശാസ്ത്രസാഹിത്യപരിഷത്തിനും യുക്തിവാദ സംഘത്തിനും ഇതുപോലൊന്ന് സംഘടിപ്പിക്കാമെങ്കിൽ സൂപ്പറായിരുന്നേനെ.
“ഒരു ബിന്ദുവിൽനിന്ന് ചിതറിത്തെറിക്കുന്ന” ബിഗ് ബാംഗ് അടിപൊളി.... ഈ വിഡ്ഢികളെയൊക്കെ എവിടുന്ന് പടച്ചുവിടുന്നതാണോ !
ബുദ്ധിമാനായ ആ ഡിസൈനർ എവിടെ പാത്തിരുന്നിട്ടാണോ ആവോ ഡിസൈൻ ചെയ്ത് മലത്തുന്നത് !
നിവൃത്തിയില്ല അപ്പൂട്ടാ..ഇതൊക്കെ നടക്കും ഇവിടെ. ഇതിനെ സമാന്തരമായി എങ്ങിനെയൊക്കെ വെല്ലുവിളിക്കാം എന്നു മാത്രമേ ആലോചിക്കേണ്ടതുള്ളു. യുക്തിവാദികളാകട്ടെ, ദിവ്യാത്ഭുതശക്തി അനാവരണത്തിൽനിന്ന് ഒരടി മുന്നോട്ട് പോവുകയും ചെയ്തിട്ടില്ല. പോസ്റ്റിനു നന്ദി. അഭിവാദ്യങ്ങളൊടെ
അപ്പൂട്ടാ,
പോസ്റ്റിങ്ങ്‌ വളരെ നന്നായി. മന്ത്രിമാര്‍ മതപരിപാടിയില്‍ പങ്കെടുക്കുന്നത് ശരിയല്ല. ഈയിടെ ഏതോ മെത്രാന്റെ ഷഷ്ടിപൂര്‍തിക്കോ മറ്റോ കമ്മ്യൂണിസ്റ്റു മന്ത്രിയെയും പാര്‍ടി നേതാവിനെയും കണ്ടു. മതം രാഷ്ട്രീയത്തില്‍ ഇടപെടരുത് എന്ന് ഒരു സ്ഥലത്ത് പറയുക എന്നിട്ട് ഈ ളോഹച്ചാത്തന്മാരെ (യുക്തിവിചാരം മാസികയില്‍ നിന്ന് കടമെടുത്ത പ്രയോഗം) പുകഴ്ത്തുക. രാഷ്ട്രീയക്കാരെന്തിനാ മത കാര്യത്തില്‍ സംബന്ധിക്കുന്നത്?
നമ്മുടെ നാട്ടില്‍ ഉദ്യോഗസ്ഥന്മാരും മത പരിപാടിയില്‍ പങ്കെടുക്കുന്നത് കാണാം. ഇതൊന്നും സെക്യൂലറിസതിനു പറ്റിയതല്ല. സീസറിനുള്ളത് സീസര്‍ക്കും ദൈവത്തിനുള്ളത് ദൈവത്തിനും എന്ന് കേട്ടിട്ടില്ലേ? അതാണ്‌ ശരി. മാത്രമോ? അശാസ്ത്രീയമായ കാര്യങ്ങള്‍ പഠിപ്പിക്കുന്ന പരിപാടി ഉത്ഘാടനം ചെയ്യുന്നത് തന്നെ ഭരണഘടനയിലെ തത്വങ്ങള്‍ക്ക് വിരുദ്ധമാണ്. ശാസ്ത്രബോധം വളര്‍ത്തിയെടുക്കണമെന്നാണ് നിര്‍ദ്ദേശകതത്വങ്ങളില്‍ പറയുന്നത്. എനിക്കും ഒരു ബ്ലോഗ് ഉണ്ട്: nireeswaravadam.blogspot.com നോക്കുമോ
ഇവന്മാരെ ചന്തിക് നല്ല പെട കൊടുത്ത് ഓടിക്കുകയാണ് വേണ്ടത്. സ്വന്തം വിശ്വാസത്തില്‍ അവര്‍ക്ക് തന്നെ വിസ്വാസമില്ലാഞ്ഞിട്ടാനവോ ഇമ്മാതിരി പരിപാടിയും കൊണ്ട് ഇറങ്ങിയിരിക്കുന്നത്. പിന്നെ ആരൊക്കെ എന്തൊക്കെ പറഞ്ഞാലും അവര് പിടിച്ച മുയലിനു കൊമ്പ് 4 തന്നെ ആയിരിക്കും
>>> വിദേശങ്ങളിൽ ഇതിനെ കൌണ്ടർ ചെയ്യാൻ ഏയ്തീയിസ്റ്റ് സംഘടനകളുടെ നേതൃത്വത്തിൽ ശാസ്ത്ര എക്സിബിഷനുകൾ സംഘടിപ്പിക്കാറുണ്ട്. നമ്മുടെ ശാസ്ത്രസാഹിത്യപരിഷത്തിനും യുക്തിവാദ സംഘത്തിനും ഇതുപോലൊന്ന് സംഘടിപ്പിക്കാമെങ്കിൽ സൂപ്പറായിരുന്നേനെ. <<<
ഇവിടുത്തെ യുക്തിവാദ സംഘത്തിന് വല്ല വിവാദവും ഉണ്ടാക്കി ജനശ്രദ്ധ തിരിക്കാനെ കഴിയൂ.
എന്തുകൊണ്ട് അവര്‍ക്ക് കൃത്യമായ വിദ്യാഭ്യാസം ഇക്കാര്യത്തില്‍ നല്‍കിക്കൂടാ. ദിശ സംഘടിപ്പുക്കുന്നവര്‍ക്കും ഈ വിഷയത്തില്‍ തെറ്റായ ശാസ്ത്രം പഠിപ്പിക്കണം എന്നുണ്ടാവില്ല. അത് ഡയലോഗ് സെന്റര്‍ കേരള നടത്തുന്നതായാലും, ക്രൈസ്തവ സംഘടന നടത്തുന്നതായാലും.
Post a Comment